يا الـساقي

يا الـساقي عمّر لي الـكاس، و خلـّيني نـنوم ف هاذ الـبلاص
نهار ليوم فات ب همومهُ، جا الـليل و حبّيت نـنسى مساؤلهُ
خوّيت الـبال من كـُل بلانهُ، بقى الـقلب وحيد و سالو دمايهُ
...

جاو ني ريم و مريَم

جاوني زوج بنات فل منام
ريم و مريَم كي الـحوريّات
و آنا الـمهموم الـسّاهي
...
ريم شعرها كحل كي الـتوت و تهدر بل معاني
قالت شي كلام لي بيه حيّرتني
جاوبَتها مريَم بل عود لا كلام
غير هوا رقيق و يـماجي
...
و آنا نتبّع فل لعب نسيت همايمي
و غمّرت فل غيس الـدّافي

...
بعد شي دقايق فطنتْ غير وحدي
لا ريم لا مريَم معايا
و لا فكار لا همّ ف راسي
متمعّن فل لي كان مداور بيا
غريد الـمقنين و الـمسيل الـجاري
اللي منل بديَة و هوما حدايا ...ـ

بكيت و سهيت

آش بيك يا روحي ساهية فل سما
مين ذاتك في الـارض ما سامعاش ليها
...
آش بيك يا بالي تتمعّن معا الـهوى
و هوى‘ داتك ما عاطي لهُش قيمة
.....
تمنّيتْ لوكان جاو الـحباب فل دنية
ب طول‘ الـعمر،عمرهم يفناو

Abstrait - الـلّاشي

لشّي فكارك و دخّلها ف هواى ْالـروح،
ف ذات ْالـنفس اللّي فيه ما يثقّلها لا وجع و لا لذ
....

الـتجرة

دل عيشة ما عندها دين ،غير دين الـمال، يحق و يحرّم ...
آنا نتاجرْ، ذاك ليّا خير، مين ضيق الـحيوط، ما نطيقش نصبر ...
نبيع و نشري و ل خيري نسهّل، و اللي بالي نامه، ما هوش موحال ...
شي يدخل و شي يخرج، و شحال ربحتْ ليوم، يادرا؟ ...
.............
صلّيتْ ل ربّي و دعيتْ مولاي، حانوت جاري تصيبهُ موصيبه ...
داري جديدة، خمسة فل عيْن، نهاري خدمة و ليلي تخمام ...
.............
نتا اللي فيّا تخزر، برك شوف ليوم و اسمعني مليح ...
طريق الـتجرة لا صناف يفرّز، تودّرْ فيه اللي ما حصى يفرّق ...
يلا ليوم نتا كيفي بغيت الـرباح، من ﭬلبك نبدا نريّح ...
خوذ مال ذاك اللي آنا بعتْه، نشريه عليك، راني محتاجهُ ...ـ

بقيتْ حُر، ما تسالو ليش

دخل عما ف دار‘ الـغوال
الـيد فل جيب و الـفم يصفـّر
الـعيون مشنفة متضاورة بيه
هوّا ما حاصيش، ماشي ب خطاويه
ما دريتْ آنا يلا كان عالم
بل خوف هاداك لي ضاير بيه
يلا كان عالم أنا مبهوظ
نحط الـﭬارّو و عليه نكفـّف

الـبابور

زهرك كي كان هنا، مشى عليك كي ما ركبته
رفد الـبحر و معاه ناسهُ، لي عرفو له و عرفو صوالحُه
و نتين الـحزين رافد الـحجر، راسك ينوم و رجليك ثقال

.................................

هاذا غي منام، بقى لك ساعة، قلت لك ساعة بالاك نصْها
انسا الـعماش و وجع الـحفا، و هموم الـعوام يمشيو ف نهار
عايش لل ريح ولّى فل ندام...
الـدنيا وحدة واش درت بيها؟

حوال...ـ

الـمنام يدمّع الـعين كي الـراس ما يطيقش عليه
الـهول يخبّل الـراس كي الـبال ما يصيبش الـطريق
الـزعاف يكحّل الـبال كي الـيد ما تعرف باش

هدرة فل خوى

هاذي هدرة فل خوى، ما عندها همّة ما عندها معناجاتني ليوم كي الـغنيَة، بين الـنوظة و فنجال قهوة
ما عرفتْش واش حبّت، ما فهمتْش مور ماش مشاتداخل بالي صابت شي صالحة، كي الـزاوش حطّت عند التاقة
كاش ما صابت؟ فل حق ما سقسيتْ...هموم‘ الـليّام هاذاك الـهوى عمرُه ما فاد
فاتو عليّا شي صبوح، عييتْ نفهم آنا و نسيتْبين الـموالف و الـتالف، فاين الـآليف و فاين الـبا
ليوم خلّيتْ الـزّاوش على دبارُه، برك تريّحتْ ب غناه امّا هوّا تهنّى من فظولي، و بنى عشُّه على ما جاه

نص ب الـعربيّة الـجازايريّة - Algérie nouvelle